ភ្នំពេញ៖ ទិវាពលកម្មអន្តរជាតិ ១ ឧសភា ជាព្រឹត្តិការណ៍ប្រវត្តិសាស្ត្រនៃចលនាកម្មករអន្តរជាតិ ដែលកម្ពុជាតែងតែប្រារព្ធជារៀងរាល់ឆ្នាំចាប់តាំងពីឆ្នាំ១៩៧៩ រហូតមកដល់ពេលបច្ចុប្បន្ន។ ក្នុងឆ្នាំ២០២៤នេះក៏ដូចជាឆ្នាំមុនៗដែលរដ្ឋាភិបាលកម្ពុជាបានចេញសារាចរស្ដីពីការរៀបចំទិវានេះ ដោយជំរុញការផ្សព្វផ្សាយឱ្យបានទូលំទូលាយនូវសារ ការអបអរសាទរ និងការលេងកម្សាន្តនៅក្នុងទិវានេះផងដែរ ជាមួយនឹងពាក្យស្លោកដែលដាក់តាំងតាមទីសាធារណៈដែលមានដូចជា៖
-អបអរសាទរខួបអនុស្សាវរីយ៍លើកទី១៣៨ នៃទិវាពលកម្មអន្តរជាតិ ១ ឧសភា
-សហគ្រាសជាមួយជាសហគមន៍សុខសាន្តមួយ
-គោរពច្បាប់ស្ដីពីការងារ និងច្បាប់ស្ដីពីសហជីព ដើម្បីធានាសិទ្ធិនិងផលប្រយោជន៍រួមរបស់កម្មករនិយោជិតនិងនិយោជក
-សុវត្ថិភាពនិងសុខភាពការងារនៅកន្លែងធ្វើការជាកត្តាចម្បង
-មានជំនាញវិជ្ជាជីវៈ មានឱកាសការងារនិងមុខរបរ ទទួលបានប្រាក់ចំណូលកាន់តែប្រសើរ។
ដោយឡែកនៅតាមសហគ្រាសត្រូវចងបដាដែលមានដូចជា៖
-អបអរសាទរខួបអនុស្សាវរីយ៍លើកទី១៣៨ នៃទិវាពលកម្មអន្តរជាតិ ១ ឧសភា
-សហគ្រាសជាមួយជាសហគមន៍សុខសាន្តមួយ
-រួមគ្នាបង្កើនវប្បធម៌អនុលោមភាពតាមច្បាប់
-រួមគ្នាដើម្បីលើកកម្ពស់សុខដុមនីយកម្មនៃទំនាក់ទំនងវិជ្ជាជីវៈ
-រោងចក្រជាឆ្នាំងបាយរួមរបស់បងប្អួនកម្មករនិយោជិត និងនិយោជក។
រដ្ឋាភិបាលក៏បានណែនាំដល់ឱ្យមានការប្រារព្ធទិវាពលកម្មអន្តរជាតិនេះប្រកបដោយភាពថ្លៃថ្នូ ភាពចាស់ទុំ និងភាពប្រសើរឡើងនៃសិទ្ធិសេរីភាពកម្មករនិយោជិត និងសុខដុមនីយកម្មនៃទំនាក់ទំនងវិជ្ជាជីវៈដើម្បីបង្កើនការទាក់ទាញទុនវិនិយោគ និងបង្កើតឱកាសការងារកាន់តែប្រសើរ និងសមរម្យជូនកម្មករននិយោជិត និងប្រជាពលរដ្ឋ ខណៈអាជ្ញាធរដែនដី និងកម្លាំងមានសមត្ថកិច្ចត្រូវមានភារៈកិច្ចដឹកនាំអបអរសាទរទិវានេះដោយធានានូវសណ្ដាប់ធ្នាប់ និងសុវត្ថិភាពឱ្យបានល្អ៕
